Skilgreind starfsemi Gildi - lífeyrissjóðs er að taka við iðgjöldum, varðveita og ávaxta þau, og greiða út lífeyri. Gildi er langtímafjárfestir og hefur það að aðalmarkmiði að hámarka lífeyrisgreiðslur til sjóðfélaga og tryggja þeim bestu lífeyrisréttindi sem kostur er á skv. samþykktum með ávöxtun iðgjalda, áhættustýringu og hagkvæmum rekstri.
Stjórn Gildis setur áhættustefnu fyrir sjóðinn. Áhættustefnan nær yfir starfsemi Gildis og útvistun til þriðju aðila, bæði hvað varðar fjárhagslega áhættu og rekstraráhættu. Áhættustefnan skilgreinir áhættuvilja og áhættuþol sjóðsins og hvernig skuli greina, meta, vakta og stýra áhættu. Þar eru einnig skilgreind hlutverk og ábyrgð þeirra sem koma að framkvæmd áhættustýringar og áhættueftirlits innan sjóðsins. Fjárfestingarstefna sjóðsins, sem er endurskoðuð a.m.k. árlega, gegnir lykilhlutverki í áhættustýringu hans en þar eru sett fram takmörk og viðmið um helstu fjárhagslegu áhættuþætti í eignasafni hans. Áhættustefnuna skal endurskoða árlega, eða oftar ef tilefni er til, m.a. ef markverðar breytingar verða á áhættusniði sjóðsins. Stjórn sjóðsins setur einnig áhættustýringarstefnu að fenginni tillögu ábyrgðaraðila áhættustýringar. Í áhættustýringarstefnu er fjallað ítarlega um framkvæmd áhættustýringar og áhættueftirlits sjóðsins.
Áhættustefna sjóðsins byggir á lögum nr. 129/1997 um skyldutryggingu lífeyrisréttinda og starfsemi lífeyrissjóða, reglugerð nr. 590/2017 um eftirlitskerfi með áhættu lífeyrissjóða og reglugerð nr. 916/2009 um fjárfestingarstefnu og úttekt á ávöxtun lífeyrissjóða og vörsluaðila séreignarsparnaðar, með síðari breytingum. Áhættustýring innan sjóðsins tekur einnig mið af ISO staðli 31000 um áhættustýringu.
Skilgreining á hugtakinu áhætta í reglugerð nr. 590/2017 um eftirlitskerfi með áhættu lífeyrissjóða er eftirfarandi: „Hætta á fjárhagslegu tapi sem leiðir af atburði og fellur undir einn eða fleiri af þeim áhættuþáttum sem lífeyrissjóður skilgreinir.“
Áhættustýring er skilgreind sem þær áherslur, reglur, verkferlar, verklag, aðferðafræði og samantekt upplýsinga sem beitt er til að greina, mæla, meta, stýra og fylgjast með áhættu í eignasafni og starfsemi sjóðsins (í víðu samhengi).
Leitast skal við að hafa skipulag þeirra verkþátta er lúta að áhættu í starfsemi Gildis sem einfaldast til að tryggja rekjanleika og í samræmi við önnur gildi sjóðsins. Áhættustefnu Gildis er ætlað að styðja við það markmið fjárfestingarstefnu, að ávaxta fé sjóðsins með hliðsjón af hagfelldustu kjörum sem í boði eru á hverjum tíma með tilliti til áhættu.
Almennt skal miða við varfærna nálgun við stýringu á áhættu sjóðsins og að uppbygging eignasafns í heild taki mið af verðtryggðum skuldbindingum í íslenskum krónum núvirtum á 3,5% vöxtum gagnvart sjóðfélögum og eign rétthafa. Markmið með áhættustýringu er að starfsmenn og stjórn sjóðsins hafi góða yfirsýn yfir þá áhættuþætti sem til staðar eru hjá sjóðnum og geti metið hugsanleg áhrif þeirra á sjóðinn. Með því móti eru starfsmenn sjóðsins betur í stakk búnir til að stýra áhættu hans og, eftir atvikum, forðast áhættu, milda eða auka hana.
Almennt byggir áhættueftirlit og áhættustýring innan Gildis á þeim viðmiðum sem fram koma í fjárfestingarstefnu og/eða áhættustefnu. Viðmið varðandi árangur og áhættu sjóðsins, eignaflokka og undirsöfn eru skilgreind í fjárfestingarstefnu og/eða áhættustefnu Gildis. Í þeim tilfellum þar sem frekari útskýringa eða skilgreininga er þörf koma þær fram í áhættustýringarstefnu eða öðrum settum stefnum, verkferlum og viðmiðum sjóðsins.
Áhættu í starfsemi Gildis-lífeyrissjóðs má skipta í fjárhagslega áhættu og rekstraráhættu.
Fjárhagsleg áhætta er tengd fjárfestingarstarfsemi sjóðsins, þ.e. þróun eigna og skuldbindinga sjóðsins auk sjóðstreymis. Til fjárhagslegrar áhættu teljast markaðsáhætta, mótaðilaáhætta, lausafjáráhætta og skuldbindingaáhætta (lífeyristryggingaráhætta).
Rekstraráhætta sjóðsins er áhætta tengd innri starfsemi sjóðsins, sem getur haft með að gera rekstrarþætti eins og upplýsingakerfi, verkferla eða starfsmenn sjóðsins. Pólitísk áhætta er hluti af rekstraráhættu en undir rekstráhættu falla einnig aðrir áhættuþættir sem tengdir eru ytri atburðum í rekstrarumhverfi lífeyrissjóðs.
Sjálfbærniáhætta tekur til áhættu vegna umhverfis- og félagslegra málefna auk stjórnarhátta (UFS). Sjálfbærniáhætta er tengd ýmsum áhættuþáttum innan fjárhagslegrar áhættu og rekstraráhættu, þ.e. tengt samskiptum, hlutverki og ábyrgð stjórnar, stjórnenda og starfsmanna, jafnt innbyrðis sem og gagnvart öðrum hagsmunaaðilum sjóðsins. Gildi hefur sett sér stefnu um sjálfbærar og ábyrgar fjárfestingar og hlutahafastefnu, auk samskipta- og siðareglna til að ramma inn samskipti við helstu hagaðila sjóðsins.
Breytingar á áhættuþáttum geta haft áhrif á eignir og skuldbindingar og þar með tryggingafræðilega stöðu samtryggingardeildar og líkur á réttindaskerðingu. Þannig geta breytingar á áhættuþáttum haft áhrif á getu sjóðsins til að sinna skilgreindri starfsemi hans og til að ná aðalmarkmiði sínu og þar með áhættuþol og áhættuvilja. Fjallað er um helstu áhættuþætti innan sjóðsins hér að neðan. Eðli, umfang, framkvæmd áhættustýringar, áhættumælikvarðar og eftirlitsaðgerðir hvers áhættuþáttar ásamt viðhorfi sjóðsins til áhættuþátta er lýst nánar í áhættustýringarstefnu.
Markaðsáhætta
Markaðsáhætta er skilgreind sem hættan á fjárhagslegu tapi á liðum innan og utan efnahagsreiknings vegna breytinga á markaðsvirði eigna eða skuldbindinga, þ.m.t. vegna breytinga á gengi gjaldmiðla (gjaldmiðlaáhætta), vaxtastigi (vaxta-, endurfjárfestingar- og uppgreiðsluáhætta), verðbólgu (verðbólguáhætta), verði hluta- og skuldabréfa og hlutdeildarskírteina í sjóðum (sveiflur í ávöxtun), auk ósamræmisáhættu og áhættu vegna skuldbindinga utan efnahags. Áhættustig markaðsáhættu er metið með ýmsum áhættumælikvörðum s.s. VaR, staðalfráviki, verðbólgufylgni og meðallíftíma.
Mótaðilaáhætta
Mótaðilaáhætta er hættan á fjárhagslegu tapi sjóðsins ef útgefandi fjármálagernings eða annar mótaðili stendur ekki við umsamdar skuldbindingar sínar. Mótaðilaáhætta sjóðsins verður fyrst og fremst til við kaup á verðbréfum og með veitingu veðlána. Mótaðilaáhættu má flokka í útlánaáhættu, samþjöppunaráhættu, landsáhættu, uppgjörsáhættu og vörsluáhættu. Áhættustig mótaðilaáhættu er m.a. metið með lánshæfismati skuldabréfa, væntu tapi, vanskilagreiningu og samþjöppun mótaðila.
Lausafjáráhætta
Lausafjáráhætta er hættan á að sjóðurinn geti ekki staðið við skuldbindingar sínar þegar þær gjaldfalla. Meginmarkmið er að á hverjum tíma hafi sjóðurinn nægt laust fé til að standa við nauðsynlegar greiðslur og skuldbindingar. Lausafjáráhætta er almennt ekki talin stór áhættuþáttur í starfsemi sjóðsins sökum þess að vænt nettó innstreymi í sjóðinn er töluvert næstu árin og stór hluti eignasafnsins telst auðseljanlegur. Lausafjáráhættu má flokka í seljanleikaáhættu og sjóðstreymisáhættu. Áhættustig lausafjáráhættu er m.a. metið með greiningum á framtíðargreiðsluflæði og seljanleika eigna.
Lífeyristryggingaráhætta (skuldbindingaráhætta)
Lífeyristryggingaráhætta er sú hætta innan samtryggingardeildar að skerða þurfi réttindi sjóðfélaga vegna þess að eignir mæti ekki skuldbindingum til lengri tíma m.a. vegna breytinga á iðgjöldum, tryggingafræðilegri uppgjörskröfu (skerðingaráhætta), lýðfræðilegum þáttum svo sem lífslíkum og fjölda öryrkja og örorkulíkum hjá sjóðnum auk umhverfis- og réttindaflutningsáhættu. Áhættustig lífeyristryggingaráhættu er m.a. metið með tryggingafræðilegri stöðu, lífeyrisbyrði, lýðfræðilegri samsetningu sjóðfélaga og sviðsmyndagreiningum.
Rekstraráhætta
Rekstraráhætta er hættan á neikvæðum áhrifum á sjóðinn vegna ófullnægjandi eða gallaðra innri verkferla, mistaka og aðgerða eða aðgerðaleysi starfsmanna, sviksemi, ófullnægjandi upplýsingakerfa eða vegna ytri atburða í rekstrarumhverfi sjóðsins. Rekstraráhætta nær til starfsmannaáhættu, áhættu vegna svika, áhættu vegna upplýsingatækni, áhættu vegna aðstöðu eða ófullnægjandi öryggisráðstafana, lagalegrar áhættu, upplýsingaáhættu, útvistunaráhættu, orðsporsáhættu og pólitískrar áhættu (lög og reglur). Þessir áhættuþættir eru undirliggjandi í allri starfsemi sjóðsins. Áhættustig rekstraráhættu er metið út frá áhrifum af hverjum áhættuþætti og líkum þeirra.
Sjálfbærniáhætta
Áhætta tengd sjálfbærni vísar til ýmissa áhættuþátta sem varða möguleika fyrirtækja og stofnanna til að viðhalda arðbærri starfsemi og getu þeirra til að halda áfram rekstri á sjálfbæran hátt til lengri tíma. Sjálfbærniáhætta getur m.a. verið vegna beinna eða óbeinna áhrifa umhverfisþátta, félagslegra þátta eða stjórnarhátta (UFS). Ef áhættan raungerist getur það mögulega haft neikvæð áhrif á virði eigna lífeyrissjóðsins. Megináhætta sjóðsins tengd umhverfismálum (m.a. loftslagsbreytingum), félagslegum málefnum (þ.m.t. mannréttindum) og stjórnarháttum er að fjárfest sé í fyrirtækjum sem ekki sinna lögboðinni og/eða siðferðislegri skyldu sinni sem skapað getur tjón og/eða orðsporsáhættu fyrir sjóðinn. Áhættustig sjálfbærniáhættu er m.a. metið út frá áhrifum af hverjum áhættuþætti og líkum þeirra.
Áhættuvilji
Áhættuvilji er skilgreindur sem sú áhætta sem stjórn sjóðsins er reiðubúin að taka.
Áhættuvilji Gildis fyrir samtryggingardeild og séreignarleiðir er varðar fjárhagsáhættu er skilgreindur í fjárfestingarstefnu sjóðsins, flokkaður eftir hefðbundnum eignaflokkum, sem bil milli vikmarka í fjárfestingarstefnu fyrir hvern eignaflokk. Markar það vilja sjóðsins til eignadreifingar og samsetningar markaðs- og mótaðilaáhættu niður á einstaka eignaflokka hverju sinni, sem og innan hverrar tegundar innlendra skuldabréfa. Vikmörkin eru sett til viðbótar við fjárfestingarstefnu og vikmörk eignasafns eftir tegundaflokkum A-F (sbr. fylgiskjal fyrir fjárfestingarleiðir sjóðsins í viðauka í fjárfestingarstefnu).
Markmið fjárfestingarstefnu er að ávaxta fé sjóðfélaga með hliðsjón af hagfelldustu kjörum sem í boði eru á hverjum tíma að teknu tilliti til áhættu.
Við mótun fjárfestingarstefnu eru skoðaðir þættir eins og lífeyrisbyrði, tryggingafræðileg staða, aldursdreifing sjóðfélaga og rétthafa, framtíðargreiðsluflæði, núverandi eignasamsetning, aðstæður á mörkuðum, áhættumælikvarðar og áhættuþol sjóðsins. Allt eru þetta þættir sem hafa áhrif á mótun fjárfestingarstefnu og þar með áhættuvilja sjóðsins sem getur verið aukinn eða minnkaður byggt á mati á fyrrnefndum þáttum sem mynda áhættusnið sjóðsins.
Áhættuvilji sjóðsins hvað varðar markaðs- og mótaðilaáhættu er einnig skilgreindur nánar með öðrum takmörkunum og viðmiðum í fjárfestingarstefnu. Sjá nánar kafla 4.9 fyrir samtryggingardeild og kafla 5.5 fyrir séreignarleiðir í fjárfestingarstefnu sem fjalla um aðrar takmarkanir og viðmið fyrir fjárfestingarleiðir sjóðsins.
Áhættuvilji sjóðsins er varðar lausafjáráhættu er skilgreindur með viðeigandi viðmiði um hlutfall auðseljanlegra eigna, í samtryggingardeild og séreignarleiðum. Nánari útlistun um viðmið lausafjáráhættu er að finna í viðauka 1 við setta áhættustýringarstefnu.
Áhættuvilji sjóðsins er varðar rekstraráhættu er skilgreindur þannig að koma eigi í veg fyrir þá áhættu sem ógnar getu sjóðsins til að sinna skilgreindri starfsemi sinni og til að ná aðalmarkmiði sínu.
Önnur viðmið til áhættumildunar má sjá í fjárfestingarstefnu og áhættustýringarstefnu sjóðsins. Í áhættustýringarstefnu má einnig finna skilgreiningar og viðhorf sjóðsins til einstakra áhættuþátta.
Áhættuþol
Áhættuþol samtryggingardeildar og séreignarleiða sjóðsins er varðar fjárhagsáhættu markast af settum vikmörkum í fjárfestingarstefnu, flokkuðum eftir hefðbundnum eignaflokkum, þ.e. hámarks- og lágmarkshlutföll einstakra eignaflokka ásamt settum vikmörkum gengisbundinna eigna. Við hreyfingu út fyrir sett vikmörk þarf sjóðurinn að grípa til aðgerða, m.a. með viðeigandi breytingum á eignasafni. Nánari útlistun á mögulegum aðgerðum er að finna í áhættustýringarstefnu og verkferlum sjóðsins.
Því til viðbótar tekur langtímaáhættuþol samtryggingardeildar mið af tryggingafræðilegri stöðu deildarinnar hverju sinni. Samkvæmt lögum ber sjóðnum að grípa til sérstakra aðgerða leiði tryggingafræðileg athugun í ljós meiri en 10% mun á milli eignaliða og skuldbindinga eða ef munur hefur haldist meiri en 5% samfellt í fimm ár, samanber 2. mgr. 39. gr laga nr. 129/1997. Sérstakar aðgerðir geta falið í sér breytingar á réttindum sjóðfélaga. Við mat á því hvaða aðgerðir séu viðeigandi er horft til þess að leita langtímalausna og eru hagsmunir sjóðfélaga hafðir að leiðarljósi. Fylgjast skal með þróun tryggingafræðilegrar stöðu og beita fyrirbyggjandi aðgerðum ef þess er kostur. Nær þetta bæði til atvika er lúta að eignum og skuldbindingum, þ.e. allra atvika er geta orðið þess valdandi að lífeyrissjóðurinn geti ekki staðið við skuldbindingar sínar.
Komið er inn á helstu áhættuþætti síðar í þessari stefnu en fjallað er nánar um áhættustýringu, áhættumælikvarða og eftirlitsaðgerðir einstakra áhættuþátta í áhættustýringarstefnu sjóðsins.
Stjórn Gildis ber ábyrgð á mótun og setningu áhættustefnu og áhættustýringarstefnu fyrir sjóðinn og ber framkvæmdastjóri ábyrgð á að þeim sé framfylgt, bæði er varðar fjárhagslega áhættu og rekstraráhættu.
Með áhættustefnu og áhættustýringarstefnu veitir stjórn Gildis framkvæmdastjóra og öðrum þeim sem hún framselur heimildir til, heimild til stýringar áhættu og eftirlits með henni í starfsemi sjóðsins í samræmi við það sem hér kemur fram og innan þeirra heimilda sem hér eru skilgreindar. Framkvæmdastjóri og aðrir sem sinna áhættustýringu og áhættueftirliti og hjá Gildi upplýsa stjórn sjóðsins reglulega um árangur og áhættu starfseminnar og ákvarðanir er varða áhættustýringu og áhættueftirlit.
Í skipulagi Gildis er sérstakt starfssvið, áhættustýring, sem heyrir beint undir framkvæmdastjóra. Áhættustýring sinnir eftirliti bæði er varðar fjárhags- og rekstrarlega áhættu, áhættumælingum á eignasafni og skuldbindingum sjóðsins og kemur að skráningu frávika og eftirfylgni þeirra. Áhættustýring skal milliliðalaust geta lagt fram skýrslu til stjórnar um niðurstöður sínar og viðeigandi ráðstafanir. Forstöðumaður áhættustýringar er skilgreindur sem ábyrgðaraðili áhættustýringar hjá sjóðnum og ber því ábyrgð á framkvæmd eftirlitsverkefna með áhættu með hliðsjón af starfsemi sjóðsins. Eignastýring Gildis hefur það hlutverk að stýra fjárhagslegri áhættu sjóðsins m.a. með ákvörðunum um kaup og sölu verðbréfa, í samráði við framkvæmdastjóra og stjórn sjóðsins eins og við á hverju sinni. Framkvæmdastjóri ber ábyrgð á að stýra rekstraráhættu sjóðsins í samráði við stjórn hans með ákvörðunum um rekstur. Þannig er aðskilnaði náð milli áhættueftirlits annars vegar og ákvarðana um stýringu á áhættu sjóðsins í fjárfestingum og rekstri hins vegar. Stjórn sjóðsins, framkvæmdastjóri og eignastýring geta óskað eftir áliti áhættustýringar eða utanaðkomandi aðila þegar það á við.
Allir starfsmenn sjóðsins koma að framkvæmd áhættustýringar eftir því sem við á og skulu vera meðvitaðir um mikilvægi eftirlitskerfis og taka þátt í innleiðingu viðeigandi áhættumenningar innan sjóðsins. Það er meðal annars gert með því að kynna fyrir starfsmönnum áhættustefnu og áhættustýringarstefnu með viðeigandi hætti hverju sinni. Aðilar sem hafa aðkomu að ákvörðunum tengdum fjárfestingaráhættu kynna sér og taka þátt í mótun áhættu- og áhættustýringarstefnu. Til viðbótar er öllum starfsmönnum gerð grein fyrir þeim þáttum stefnanna sem snúa að þeirra starfsviði í starfslýsingum þeirra, verkferlum sjóðsins og árlegu rekstraráhættumati. Einnig skal leitast við að eftirlitskerfi sjóðsins sé sett upp á skýran og rekjanlegan hátt og að verkferlar og starfslýsingar endurspegli áhættustýringu sjóðsins, eftirlitsaðgerðir og eftirlitskerfið í heild sinni.
Almennt bera forstöðumenn ábyrgð á því að viðeigandi áhættumildandi aðgerðir séu framkvæmdar skv. verkferlum. Frekari ábyrgð á rekstraráhættuþáttum og tilheyrandi áhættumildandi aðgerðum er skilgreind í rekstraráhættukerfi sjóðsins. Eigendur rekstraráhættuþátta bera ábyrgð á árlegu áhættumati á þeim, mati á því hvort þeim sé stýrt með fullnægjandi hætti og skráningu atvika/frávika. Eigendur áhættumildandi aðgerða bera ábyrgð á því að þær séu framkvæmdar og rétt skráðar í rekstraráhættukerfi og verkferlum sjóðsins. Áhættustýring ber ábyrgð á eftirfylgni í rekstraráhættumati, hönnun á eftirlitskerfinu og ráðgjöf, fræðslu og upplýsingagjöf hvað varðar rekstraráhættu til starfsmanna og stjórnar.
Yfirlögfræðingur sjóðsins sinnir eftirliti með reglu- og lagabreytingum ásamt því að fylgjast með hagsmunaskráningu starfsmanna og stjórnarmanna. Hann er einnig ábyrgðarmaður aðgerða gegn peningaþvætti ofl.
Innri endurskoðandi heyrir undir stjórn Gildis og kannar hvort innra eftirlit sjóðsins sé í samræmi við stefnu og reglur sjóðsins. Hann leggur m.a. mat á eftirlitskerfi sjóðsins og hefur eftirlit með framkvæmd áhættustefnu og áhættustýringarstefnu sjóðsins.
Áhættustefna, áhættustýringarstefna og breytingar á þeim eru lagðar fyrir stjórn Gildis til samþykktar að fenginni umsögn endurskoðunarnefndar sjóðsins sem metur skilvirkni og fyrirkomulag áhættustefnu og áhættustýringarstefnu.
Ár hvert skal framkvæmt eigið áhættumat á starfsemi sjóðsins þar sem stjórn sjóðsins er virkur þátttakandi með því að móta framkvæmd áhættumatsins m.a. með því að rýna ferli, endurskoða forsendur og niðurstöður matsins. Meta skal einnig hvort áhættustefna og fjárfestingarstefna séu viðeigandi í samræmi við niðurstöðu eigin áhættumats.
Eigið áhættumat nær m.a. til greiningar á helstu áhættuþáttum, lýsingar á aðgerðum og forsendum matsins, niðurstaðna eftirlitsaðgerða með og án áhættumælikvarða og, þegar við á, áhættumildandi aðgerða og þeirra aðgerða sem lífeyrissjóðurinn hyggst grípa til ef áhætta raungerist. Stuðst er við sviðmyndagreiningar, næmnigreiningar og álagspróf í áhættumatinu m.a. til að meta hvernig áhættutaka fellur að skuldbindingum sjóðsins og hver virkni áhættumildandi aðgerða sé, eftir því sem við á.
Til þess að ákvarða mikilvægi áhættuþátta metur sjóðurinn áhrif hvers áhættuþáttar út frá líkindum þess að áhættan raungerist og áhrifum á eignir og skuldbindingar hans. Við matið er m.a. tekið tillit til þeirra áhættumælikvarða sem fylgja hverjum áhættuþætti, þróun þeirra, sviðsmyndagreininga, álagsprófa og annarra eftirlitsaðgerða sem farið hafa fram yfir árið.
Miðað er við að eigið áhættumat liggi fyrir þremur mánuðum eftir að ársreikningur sjóðsins liggur fyrir. Fyrir 30. júní ár hvert er skýrsla um eigið áhættumat send til Fjármálaeftirlitsins. Niðurstöður eigin áhættumats eru kynntar fyrir starfsmönnum sjóðsins og tekið er tillit til þeirra við ákvörðunartöku og annarra aðgerða í daglegri starfsemi sjóðsins þegar við á.
Nánari umfjöllun um eigið áhættumat er að finna í áhættustýringarstefnu og í skýrslu um eigið áhættumat.
Frávik er skilgreint sem tilvik sem hefur marktæk fjárhags- eða rekstrarleg áhrif á sjóðinn, frávik í upplýsingatækni eða frávik frá settum viðmiðum og mörkum í fjárfestingar-, áhættu-, og áhættustýringarstefnu eða frávik frá fylgni við fjárfestingarheimildir. Möguleg frávik skal tafarlaust tilkynna viðeigandi stjórnendum sjóðsins, þ.e. til framkvæmdastjóra og forstöðumanns áhættustýringar, ásamt eiganda áhættuþáttar sem atvikið tengist. Skulu viðkomandi stjórnendur í framhaldinu leggja mat á það hvort um staðfest frávik sé að ræða.
Upplýsa skal stjórn um öll staðfest frávik eins fljótt og auðið er. Ef upp kemur staðfest frávik skal Fjármálaeftirlitinu jafnframt tilkynnt um það beri að gera það samkvæmt gildandi reglum og leiðbeinandi tilmælum á hverjum tíma.
Halda skal atvika- og frávikaskráningu í atvikahluta rekstraráhættukerfi sjóðsins og bera eigendur undirliggjandi áhættuþáttar ábyrgð á skráningu og eftirfylgni með atvikinu. Reynt skal eftir fremsta megni og svo fljótt sem auðið er að bregðast við frávikum og eftir atvikum að lágmarka mögulegan skaða sem af þeim getur hlotist. Ef frávik hafa orðið eru þau jafnframt tiltekin í ársfjórðungslegum skýrslum áhættustýringar til stjórnar hverju sinni og þar upplýst hvort viðeigandi ráðstafanir hafi verið gerðar.
Reykjavík 8. maí 2025