Séreignarsparnaður hjá Gildi
Séreignarsparnaður er ein hagkvæmasta sparnaðarleiðin í dag sem styður við þig í gegnum allt lífið. Hann getur nýst þér við fasteignakaup, niðurgreiðslu húsnæðislána og til að byggja upp aukið fjárhagslegt öryggi fyrir eftirlaunaárin.
Af hverju að velja séreignarsparnað?
Sparnaður sem vex strax
Þú getur lagt allt að 4% af heildarlaununum þínum í séreignarsparnað. Þú greiðir engan skatt af framlaginu þegar þú leggur það inn og vinnuveitandinn greiðir á móti jafnháa upphæð, sem jafngildir launahækkun upp á allt að 2%.
Þannig má segja að sparnaðurinn meira en tvöfaldist strax, ef við miðum við algengustu leiðina, að þú greiðir 4% af laununum þínum og vinnuveitandinn 2%.
Þín leið til að eignast íbúð
Ein leið til að nýta séreignarsparnað er að nota hann til að kaupa íbúð. Það er bara hægt að nýta þessa leið þegar þú kaupir fyrstu íbúðina þína eða ef þú hefur ekki átt íbúð síðustu 5 ár. Þú mátt nýta alla upphæðina skattfrjálst sem þú hefur sparað inn á útborgun á íbúðinni.
Þegar þú hefur eignast íbúð getur þú nýtt greiðslur í séreignarsparnað til að lækka íbúðalánið þitt skattfrjálst. Þannig eignastu íbúðina hraðar og greiðslubyrðin lækkar með tímanum.
Öryggisnet fyrir þig og þína
Séreignarsparnaður er ólíkur venjulegum lífeyrissparnaði að því leyti að hann er allur þín persónulega eign og erfist ef þú deyrð. Hann getur því verið mikilvægt öryggisnet fyrir þína nánustu ef eitthvað kemur fyrir.
Séreignarsparnaður er líka tryggari en flestar eignir því ekki er hægt að ganga að honum ef þú lendir í greiðsluvanda eða ferð í gegnum gjaldþrot.
Ávöxtun í þína þágu
Sparnaðurinn ávaxtast með tímanum líkt og annar sparnaður, í takt við fjárfestingarleiðina sem þú velur, og hækkar með tímanum inneignina þína enn meira. Séreignarsparnaður er líka öðruvísi en annar sparnaður því þú greiðir engan fjármagnstekjuskatt af ávöxtuninni.
Hversu mikið þú sparar fer eftir því hversu há launin þín eru og hversu hátt hlutfall af laununum þú greiðir í sparnað.
Þú velur fjárfestingarleið
Það er persónubundið hvernig fólk hugsar um sparnaðinn sinn og þess vegna skiptir máli að geta valið á milli góðra kosta.
Í Eign hefurðu val um leiðir sem henta ólíkum markmiðum. Til dæmis geta meiri áhætta og sveiflur í eignasafninu hentað þeim sem vilja góða ávöxtun til langs tíma. Öruggari kostir sem eru ólíklegir til að sveiflast mikið geta hentað þeim sem ætla að nota sparnaðinn fljótlega, t.d. í íbúðarkaup.
Í Eign er líka hægt að velja leið sem aðlagar áhættu með aldrinum og hversu langt er í eftirlaunaaldur og svo leið þar sem fjárfest er í erlendum eignum og gert upp í evrum.
Við mælum með því að þú kynnir þér leiðirnar vel og komir til okkar í ráðgjöf ef þú hefur spurningar sem við svörum ekki hér.