Reglur um lánveitingar, samþykktar af stjórn Gildis - lífeyrissjóðs.
Skilyrði fyrir lánveitingu eru:
- Umsækjandi þarf að vera sjóðfélagi í Gildi - lífeyrissjóði eða rétthafi í Séreignarsjóði Gildis.
- Umsóknir eru teknar til afgreiðslu eftir því sem þær berast.
- Lán eru verðtryggð miðað við vísitölu neysluverðs. Hægt er að velja milli fastra vaxta eða breytilegra vaxta. Fastir vextir miðast við útgáfudag skuldabréfsins og eru nú 4,5%. Breytilegir vextir eru samkvæmt ákvörðun stjórnar sjóðsins. Breytilegir vextir eru nú 3,9%. Einnig er hægt að velja á milli jafnra afborgana eða jafngreiðslulána (annuitets lán).
- Lánstími er 5 - 40 ár.
- Lágmarkslán sem sjóðurinn veitir er kr. 500.000.-
- Afborganir eru tvær eða fleiri á ári að vali lántaka.
- Lántökugjald er 1% af lánsupphæð. Þinglýsingar og stimpilgjöld, svo og innheimtukostnað banka ber lántaka að greiða.
- Fasteignaveð: Aðeins er lánað gegn fasteignaveði í íbúðarhúsnæði lántaka, maka hans eða aðila sem hann er í sambúð eða staðfestri samvist með. Heimilt er þó að veita lán til foreldris sjóðfélaga gegn veði í íbúðarhúsnæði þess. Veðsetningarhlutfall skal aldrei vera hærri en 65% af fasteignamati viðkomandi eignar. Í stað 65% af fasteignamati má þó miða við 65% af sölumati löggilts fasteignasala sem valinn skal í samráði við starfsmenn sjóðsins. Lántaki greiðir kostnað við slíkt sérmat ef til kemur. Hvort sem miðað er við 65% af fasteignamatinu eða 65% af sölumatinu má veðsetning þó aldrei fara yfir 100% af brunabótamati eignarinnar.
Ekki er lánað út á eignir sem eru með lægra fasteignamat en kr. 4.000.000.-
Heimilt er að þrengja veðreglur, ef markaðsverð eigna gefur tilefni til þess. Einnig er skylt að leggja fram greiðslumat ef sjóðurinn óskar eftir.
Lán eru veitt gegn veði í íbúðum sem háðar eru kvöðum um félagslegar íbúðir ef kaupskylda sveitarfélags er fallin niður og veðmörk eru innan marka sjóðsins.
Hvað þarftu að taka með þér?
Eftirtalin gögn þurfa að berast skrifstofu sjóðsins ef lánsumsókn er samþykkt:
- Veðbókarvottorð. Sjóðurinn getur útvegað veðbandayfirlit, kostnaður 1.000 kr. dregst frá láni.
- Síðustu greiðslukvittanir fyrir nýjar eftirstöðvar áhvílandi lána eða síðustu greiddu greiðsluseðlar (kvittanir).
- Afrit af tryggingabréfum sem hvíla á eigninni.
Lánsumsóknum verður svarað símleiðis eða með tölvupósti þegar öll nauðsynleg gögn hafa borist sjóðnum og þau yfirfarin.
Hægt er að nálgast upplýsingar um fasteignamat og brunabótamat fasteigna á vef Fasteignamats ríkisins (www.fmr.is).
